كل ناجح فى نظام فاشل ..فهو فاشل

(كل ناجح فى نظام فاشل ..فهو فاشل).

تأليف amal mohamed elsaaidy

لا نجد سوى الإستمرار فى قول الكلمة الأشهر ( حسبنا الله ونعم الوكيل ) فى كل من ساهم فى ضياع عقولنا وتفتتها وهدمها .نعيش بلا عقول بالمعنى المفهوم للكلمه تاهت منا القدرة على التمييز والتفرقه بين الأشياء وكدنا أن نفقد حاسة الحياة.
فمن منا لم تصبه لعنة التعليم فى مصر بالطبع لا يوجد من هو فى مأمن تام منها او من توابعها ان لم يكن عليه بشكل مباشر فبالطبع سوف يكون على احد اقاربه او جيرانه فالدم مبعثر والثأر لاينتظر له النسيان وكيف لنا أن ننسى أساسا.....!!!..
فمن مساوئ التعليم في مصر أنه يخلو من نظامٍ يستطيع به الطالب التعرُّف على مواهبه وميوله، كما أن المدرسين لا يدربون على اكتشاف ميول الطلاب وتوجيههم إليها.
هنقف شوية مع الثانوية العامة والمهازل اللي فيها أولاً هو ليه احنا عندنا التعليم بالبشاعة ديه؟
يعني الموضوع في مصر عندنا حياة أو موت..وفى الجزء دا مش بوجه انتقادى للنظام التعليمى فقط بس كمان للأسره اللى عليها عامل كبير فى الضغط على الابناء لتغيير مسار حياه طول عمرهم بيرسموه وبيحلموا بيه ودا بس لمجرد مثلا شكل الوالد امام اصدقائه وازاى ابنى ميدخلش كله الطب او الصيدله مثلا زى ابن صاحبى فلان الفلانى..وعدم ادراكه الكامل بإمكانيات ابنائه ودا فى الاخر اللى بيكون سبب الفشل الذريع للأبناء الضحايا ويتقالهم فى الاخر ........(اصل انت غبى ومبتذاكرش)!!.

أصل الأهتمام بالتعليم والمصاريف اللي بتتصرف علي الدروس واللي بيحصل عندنا في مصر لو شافه أي حمار مش بيفهم هيقول الناس ديه جامدين أوي وبيهتموا بالعلم والتعليم وبيقطعوا نفسهم عليه أكيد مصر ديه أحسن بلد في الدنيا
طيب تعالوا بقي نتكلم احنا من وجهة نظرنا الجميلة خالص عشان احنا ناس بنفهم أوي وكلنا بسم الله ماشاء الله خبره في تحليل الشخصيات والأمورالواحد فينا تلاقيه دكتور ومهندس ومحاسب وفي وقت الزنقة داية
طبعاً...مش احنا المصريين ليه بقي احنا بنقطع نفسنا عشان ندخل كلية الطب او الهندسة او الصيدلة أو غيرها من كليات القمه.
اه....عشان نلاقي شغل ايوة ايوة...احنا فاهمين ...الناس ديه بتشتغل بفلوس كتير ومش محتاجين أي حد أتحداكم إن لقيتم مهندس واحد قاعد من غير شغل ( !!! )...وبيتخرج من هنا مش بيدخل الجيش وكمان بيشتغل في تخصصه أيوة...تخصصه اللي اتعلمه وعرف عنه كل حاجة في الكلية....في التعليم الجامعي المحترم جداً....النزيه....القوي...المخلص.....الأمين.....
..امال الناس بتموت نفسها ليه عشان يجيبوا مجاميع كبيرة ويدخلوا كليات القمة ولو ومعرفش يدخلها بقي يبقي انسان فاشل....منبوذ من المجتمع
ويضطر أبوه يبيع قراطين الارض اللي حيلته وامه ترهن دكرين البط المتزغطين عشان يجمعولوا فلوس ويدخلوه كلية خاصة.....ايوة.....التعليم غاية مش وسيلة احنا خايفين علي البلد يبقي لازم نتعلم فهمتوا انا عاوزه اقول ايه؟؟ والا لسا...؟؟ نكمل والا كفاية كدا....الحقيقة مرّه شوية نكمل ونقول احنا بنتعلم من اجل غرض واحد فقط لا غير ايه هو ؟؟ .......هقول اهوه
احنا بنتعلم من اجل <<{{{{{{{{<<الفشخرة>>>}}}}}}> ايوة هي بتتقال كدا <<<< ...ف.ش.خ.ر.ه >>>>> عمك الحج قاعد في وسط الناس ويقول احمد ابني جاب 99% في الثانوية العامة ...وهيدخل كلية الطب إن شاء الله اصله نبيه وذكي وبيفهم...انا عيالي كلهم كداحتي اخته الكبيرة في كلية الهندسة قسم تاريخ يقوم عمك الحج اللي قاعد جنبه حاطط راسه ووشه في الارض أصل ابنه علاء جاب مجموع أقل من أحمد ابن عمك الحج الأول كدا علاء لأبوه العار يا جدعان.
أبو نسمه جاله عريس ميترفضش لبنته....بيشتغل مهندس
عريس لقطة ميتفوتش...الراجل دا ديما حظه في رجليه...بنته هتتجوز مهندس.... لا حول ولا قوة الا بالله احنا اللي عملنا كدا في نفسنا
مع ان مثلا كلية الطب فيها ناس وحشين وناس حلويين...ناس اغنية وناس فقرا زيها زي التجارة زي الاعلام زي الالسن زي الخدمة الاجتماعية هو احنا مش محتاجين في البلد محاسبين زي ما احنا محتاجين مهندسين؟؟ هو شغلانة المحاسب او المدرس عيب ومتشرفش؟؟
زمان كانت مدرسة الحقوق(كلية الحقوق) هي كلية القمة في مصر واللي كان اللي يدخلها ابوه بيباهى بيه في كل قاعدة طيب هي فين الحقوق دلوقتي علي الخريطة؟؟ أحنا البلد الوحيدة اللي في العالم اللي عندها مسمي كليات القمة والقاع في أي دولة محترمة هتلاقي الكليات ديه بالقدرات يعني ميشتغلش دكتور غير اللي ينفع يبقي دكتور فعلا....وكذلك المهندس
دلوقتي التمرجي ممكن يعمل العملية احسن من الدكتور نفسه ودماغه تون عليه ينتحل شخصية طبيب ويفتح عيادة ويتقبض عليه مع ان شغله نظيف وعلي ميه بيضا ومحدش اشتكي منه مش هتلاقي دا غير في مصر بس والمحاسب دا راجل عبقري في الحسابات والمراجعات وبيتحط في منصبه ومكانه الصح وكذلك المدرس الرجل المناسب في المكان المناسب....عندهم هناك
الثانوية العامة مش مقياس لتصنيف الناس ولا هي حكم بالأعدام علي زهرة شباب البلد لمجرد انه اخفق وفرقة معاه الطب والهندسة علي 1% ودا يخلي شباب صغير يفكر في الانتحار ويصاب بعقدة نفسية طول عمره والناس تشاور عليه وتقول اصله يا عيني كان نفسه يدخل كلية كذا....بس حظه بقي وكأن الزمن وقف ومش هيمشي

..... عموما يا جماعه انا تعبت من الكلام .. نفسى بقى تضموا صوتكم لصوتى ونعلى نصوتنا ونسمعه للناس الكبيره .. ونقولهم ساعدونا فى حمايه الجزء الى فاضل بيفكر فى دماغنا... ودماغ الاجيال الى جايه... لو احنا خلاص راحت علينا زى ما بيقولوا يبقى خلاص ربنا يتولانا .. بس الى جاى اجيــــــــــال!!!..
وطلبى ورجائى ده بجد نابع من احترامى للعقليه المصريه وإنى بستخسر قمع عقليات ومواهب طالب مصرى بأبسط الامكانيات ممكن يكون من ابرع العلماء.... وربنا يوفقنا جميعا
وبعد ما خلصت كلامى انا عملت بحث على بعض مواقع الانترنت لتجميع معلومات ممكن تفيد وتحث اللى بقرأ المقاله ان يساعد او يعمل ابسط الاشياء

موضووووع في قمه الرووعه
الف شكر اخوي
وجعله الله في موازين حسناتك

تقبل مروري