أعجبني هذا

ليش..؟

كتب هيفاء الصقر :

في كثير من الأحيان يدور في رؤوسنا العديد من الأسئلة، ونستمر في طرحها إلى أن نجد لها إجابة واضحة صريحة تشبع فضولنا وتساؤلنا. الحقيقة «مرت في بالي وايد أسئلة وحبيت تكون مقالتي هالمرة مختلفة بهالأسئلة الكثيرة اللي دايما اسألها بيني وبين نفسي وكلي ثقة بان في غيري وايد أدور في بالهم بعد، لان بصراحة أسئلتي تخص الكويت ديرتنا واللي صاير فيها، وأكيد ما اعم هالشي على الكل بس للأسف الأغلبية هاذي حالها، بطرح هالاسئلة وبطلع اللي بقلبي مثل ما يقولون» وإن شاء الله نلاقي لها الجواب الشافي أو حتى نستفيد من طرحها ونفهم مغزاها:
ليش ما عندنا خطة تنمية حالنا حال أي دولة متطورة ويوم صار عندنا قعدنا انعذرب فيها ونماطل بتنفيذها؟ ليش المواطن عندنا يطالب بحقوقه ويتذمر وينسى ان عليه واجبات يسويها؟ ليش انتحلطم على النواب ومو عاجبنا حال المجلس واحنا اللي وصلناهم ورافضين التغيير؟ ليش بعض النواب اللي يصارخ ويطلع بلاوي فضايح غيره ويضرب وحدتنا الوطنية صار بطل ويبي مصلحة الكويت؟ ليش اغلب النواب ما عندهم غير «الاستجواب» على طول جنه ما في قبله أدوات دستورية؟ ليش كل واحد صار مسؤول لصق بالكرسي وما يبي يفج عنه ويعطي فرصة حق غيره؟ ليش كل مسؤول ما يكمل خطط إللي قبله عشان ينجز شي بدال لا يبدى من الصفر بخطة يديدة وجنه ما سوينا شي؟ ليش كل ما يت لنا منحه ولا زيادة ما نتهنا فيها بسبة غلاء الأسعار وللأسف مافي رقابة عليها؟ ليش نساعد الدول اللي تكرهنا وتغلط علينا وكل ما زاد حقدهم ومضرتهم لنا نزيد إحنا تبرعاتنا ومساعداتنا؟ ليش كل ما توقف دورية في أي شارع ما نخلص من الزحمة؟ ليش بس عندنا كل شي هبه وتقليد؟ ليش لي أخذنا درجة زينه ولا تقدير حلو قلنا «إحنا خذيناها» وإذا الدرجة والتقدير مو زينين قلنا «عطونا ياها»؟ ليش ندرس ونتعب ونسهر الليالي في التخصصات اللي نحبها وان توظفنا الوظيفة مو في مجال تخصصنا لان غيرنا ياخذ مكانا بالواسطة؟
ليش اغلب مشاريعنا واستثماراتنا برا الديرة؟ ليش اللي يغلط انطبطب عليه ونقولّه لا تعيدها مره ثانيه وننسى إن «من أمن العقوبة أساء الأدب»؟ ليش ما نعترف بخطأنا وتقصيرنا ودايما انقطها على غيرنا؟
مليون ليش غير إللي قلتها إدور في بالي وفي بال كل مواطن قلبه على الكويت وحاب يشوفها بخير وأحسن من قبل، بس للأسف وين نلقى جواب حق كل ليش واشلون نقدر انغير من حالنا ونصير أفضل، لان أول خطوة بهالطريج اشوي صعبه ويبيلها إرادة قويه وإيمان كبير، لان أول خطوة نبدي «نغير من نفسنا» قبل كل شي؟

موضوع جمييل

يعطييك الف عافييه